Raphaela Cueni, presidenta

Raphaela Cueni (*1988) è professuressa assistenta a l’Universitad da Son Gagl. Avant ha ella lavurà sco assistenta scientifica e docenta a l’Universitad da Basilea. Ils accents da sia activitad da perscrutaziun ed instrucziun èn il dretg constituziunal svizzer e cumparativ, spezialmain en il sectur dals dretgs fundamentals, dals dretgs umans e dal dretg da medias. Sia activitad scientifica ha manà Raphaela Cueni en differentas universitads en Svizra ed a l’exteriur, nua ch’ella ha tranter auter lavurà vi da projects davart la protecziun da la satira en il rom da la libertad d’opiniun, davart la valitaziun giuridica da scumonds da batlegiar u davart la regulaziun constituziunala dad interrupziuns da gravidanza. In project da perscrutaziun actual sa deditgescha a dumondas da la transparenza en il dretg constituziunal da la Svizra.

Raphalea Cueni ha studegià giurisprudenza a las universitads da Basilea e Genevra ed a la Columbia University Law School. Ella viva a Son Gagl.

Linguas: Tudestg, franzos, englais, talian; cumpetenzas da basa da spagnol e russ.

Matthias Hui, vicepresident

Matthias Hui (*1962) è stà enfin il 2023 coordinatur da la plattafurma NGO dals dretgs umans en Svizra tar humanrights.ch. En questa funcziun ha el coordinà rapports dad NGOs davart proceduras da rapports da stadis da la ONU e la collavuraziun dad organisaziuns per ils dretgs umans davart temas sco il rinforzament da la protecziun da discriminaziun u la politica exteriura pertutgant ils dretgs umans da la Svizra. Envers la politica e l’administraziun è el s’engaschà per dumondas sco la creaziun da la ISDU. Dapi il 2013 è el ultra da quai co-manader da la redacziun da la revista religius-sociala «Neue Wege». Pli baud è el stà activ en il sectur da la collavuraziun da svilup e politica da svilup  en la Cis-Jordania palestinaisa e tar las baselgias refurmadas Berna-Soloturn-Giura.

Matthias Hui ha studegià teologia a las universitads da Turitg, Berlin (Humboldt) e Berna; el ha absolvì in studi da diplom supplementar da dretg internaziunal/dretgs umans a l'Universitad da Berna. El viva a Berna.

Linguas: Tudestg, franzos, englais, spagnol, arab; cumpetenzas da basa da talian.

Véronique Boillet

Véronique Boillet (*1981) è professuressa ordinaria per dretg public a l’Universitad da Losanna ed advocata. En sia perscrutaziun è ella s’occupada ils davos onns cun differentas dumondas, t.a. cun la discriminaziun sin basa da la naziunalitad, da l’orientaziun sexuala e da gender u cun la protecziun da migrantas e migrants, victimas da violenza a chasa. Actualmain lavura ella en in project da perscrutaziun europeic davart la discriminaziun rassistica structurala, ha edì, ensemen cun duas collegas in cudesch davart la protecziun dals dretgs umans en il sport professiunal e scriva contribuziuns davart ils effects da la crisa dal clima per ils dretgs umans. En quest connex ha ella inoltrà cun sia collega Evelyne Schmid  in’intervenziun da terza partida pertutgant il cas «KlimaSeniorinnen encunter la Svizra» tar il Tribunal europeic dals dretgs umans.

Véronique Boillet ha studegià a las universitads da Losanna, Berna e Berlin. Ella viva a le Mont-sur-Lausanne.

Linguas: Franzos, tudestg, englais

Antonio Hautle

Antonio Hautle (*1961) è dapi il 2015 Executive Director dal UN Global Compact Network Switzerland & Liechtenstein. Il UN Global Compact (UNGC) è la pli gronda iniziativa da persistenza da l’economia ed è activ en tut il mund. Las interpresas commembras, las NGOs ed instituziuns s’obligheschan da realisar ils dretgs umans per lung da lur chadainas da creaziun da valur e da render pled e fatg mintg’onn cun in rapport public. Ultra da quai instruescha Antonio Hautle sco docent per etica a differentas scolas autas spezialisadas. Dal 2013 al 2015 è Antonio Hautle stà  manader da l’uffizi per dumondas socialas e societad dal chantun Lucerna, dal 2001 al 2013 directur da «Fastenopfer» (oz Acziun da Curaisma), dal 1996 al 2001 ha el lavurà sco avugà uffizial e manader dals servetschs socials da la citad da Lenzburg.

Antonio Hautle ha studegià filosofia, teologia catolica ed etica economica a Friburg, Jerusalem e Roma ed a ha absolvì in Master of Bussiness Admnistration (MBA) a l’Universitad da Genevra. El viva cun sia famiglia a Schenkon (LU).

Linguas: Tudestg, englais, franzos, talian.

Marianne Hochuli

Marianne Hochuli (*1959) è istoriografa ed experta da NGO. Dal 2011 al 2022 è ella stada manadra da la basa e commembra da la direcziun da la Caritas Svizra. Avant ha ella manà durant diesch onns il sectur politica da commerzi da Public Eye – pli baud Decleraziun da Berna – ed è s’occupada cun dumondas da giustia en connex cun relaziuns commerzialas e finanzialas internaziunalas. Ulteriuras staziuns èn stadas l’administraziun federala (Secretariat da stadi per migraziun, politica d’integraziun) e differentas associaziuns, per exempel la COSAS, suprastanzas e cussegls da fundaziun. Ils accents pertutgant ils dretgs umans da las staziuns professiunalas da Marianne Hochuli èn stads la politica sociala, la paupradad, la migraziun e la politica da svilup.

Marianne Hochuli ha studegià istorgia a l’Universitad da Turitg ed a l’Universitad tecnica da Berlin ed ha absolvì ina furmaziun cuntinuada en management d’organisaziuns da nonprofit. Ella viva a Turitg.

Inguas: Tudestg, franzos, englais; cumpetenzas da basa da talian e spagnol.

Xenia Rivkin

Xenia Rivkin (*1990) è advocata independenta a Genevra, spezialisada per proceduras penalas, dretg da contracts e dretgs umans. Avant sia activitad sco advocata è ella stada observatura da dretgs umans per l’Autcumissariat da l’ONU per dretgs umans en l’Ucraina da l’ost, nua ch’ella ha documentà violaziuns dals dretgs umans en il territori da conflict, oravant tut pertutgant il dretg ad ina procedura gista, il scumond da tortura, cundiziuns d’arrest e violaziuns dal dretg da guerra. Ella è commembra da la cumissiun dals dretgs umans da l’associaziun d’advocat(as) da Genevra nua ch’ella s’engascha spezialmain per advocatas ed advocats ch’èn en privel pervi da lur lavur professiunala. Cun 15 onns è Xenia Rivkin daventada activ tar Amensty International ed è stada en la suprastanza da la secziun svizra dal 2011 al 2015.

Xenia Rivkin ha studegià giurisprudenza a l’Universitad da Friburg ed a la  Global School of Law a l’Universidade Catolica de Lisboa en Portugal, ed ha absolvì ses examen d’advocata a Berna. Ella è creschida  sin en Argovia e viva a Genevra.

Linguas: Englais, tudestg, franzos, talian.

Viviana Viri

Viviana Viri è schurnalista independenta e lavura per differentas medias naziunalas ed internaziunalas. Sia expertisa en il sectur dals dretgs umans pertutga oravant tut ils champs da la migraziun, da l’asil e dals dretgs da minoritads. Ella ha realisà reportaschas davart il Libanon, la Sibiria, l’Ucraina e l’Etiopia. Ella ha vivì plirs onns en Canada nua ch’ella ha lavurà per Amnesty International e nua ch’ella è s’avischinada a la fotografia ed al film documentar. Ella scriva davart  il film, davart litteratura e fotografia. Ella collavura dapi lung temp cun la Fundaziun dals dretgs umans e cun differents festivals da film, tranter auter cun il Festival da film dals dretgs umans da Lugano.

Viviana Viri è naschida il 1983, e suenter sia scolaziun sco schurnalista è ella sa spezialisada  en il sectur da la migraziun al Forum svizzer per studis da migraziun  (SFM) da l’Universitad da Neuchâtel ed a la American University a Beirut.  Ella ha vivì plirs onns en Canada e viva actualmain a Lugano.

Linguas : talian, franzos, englais, spagnol, tudestg; cumpetenzas da basa da l’arab.